హైటెక్సిటీ చేరువలో ఫైర్ డిపార్టుమెంట్ ఎన్వోసీ లేకుండా, ఎయిర్పోర్టు ఎన్వోసీ లేకుండా, అక్రమంగా అదనపు అంతస్తుల్ని నిర్మిస్తుంటే జీహెచ్ఎంసీ ఆ నిర్మాణాన్ని నిలిపివేయకుండా ఏం చేస్తోందని హై కోర్టు శుక్రవారం ఆగ్రహం వ్యక్తం చేసింది. హైటెక్ సిటీ చేరువలో నమితా హోమ్స్ 25 అంతస్తుల ఎత్తులో నిర్మిస్తున్న 360 లైఫ్ ప్రాజెక్టు 360 Life Project ను.. 2025 మే నెలలో నిలిపివేసిన జీహెచ్ఎంసీ.. అక్రమాల్ని సరిదిద్దకుండా మళ్లీ మరుసటి నెలలోనే అనుమతుల్ని ఎలా మంజూరు చేసిందని జీహెచ్ఎంసీని నిలదీసింది.
వివరాల్లోకి వెళితే..
నమితా హోమ్స్ సంస్థ హైటెక్స్ చేరువలో 360 లైఫ్ అనే ప్రాజెక్టును నిర్మిస్తోంది. దీనికి చెందిన కొందరు షేర్ హోల్డర్లు జీహెచ్ఎంసీ పునఃఅనుమతిని ఇవ్వడాన్ని వ్యతిరేకిస్తూ తెలంగాణ హైకోర్టు Telangana High Court లో కేసు దాఖలు చేశారు. ఈ నిర్మాణంలో సుమారు పద్దెనిమిది లోపాలను గమనించిన జీహెచ్ఎంసీ.. వాటిని సరిదిద్దకుండా తిరిగి అనుమతిని ఎలా మంజూరు చేసిందంటూ ప్రశ్నించారు. దీనికి GHMC జీహెచ్ఎంసీ సమాధానమిస్తూ.. ఒకవేళ నిర్మాణ లోపాల్ని సవరించకపోతే, ఆక్యుపెన్సీ సర్టిఫికెట్ జారీ చేసే సమయంలో తగిన చర్యల్ని తీసుకుంటామని తెలియజేసింది.
అయితే, దీనిపై హైకోర్టు ఘాటుగా స్పందించింది. అలాంటి చర్యల వల్ల అక్రమ నిర్మాణాల్ని ప్రోత్సహించినట్లు అవుతుందని స్పష్టం చేసింది. ముందుగా జారీ చేసిన నిర్మాణం నిలిపివేయమనే ఆదేశం గురించి రీవాలిడేషన్ లేఖలో ఒక్కసారి కూడా ఎందుకు ప్రస్తావించలేదని బెంచి ప్రత్యేకంగా ప్రశ్నించింది. ఈ మొత్తం నిర్మాణంపై స్టే విధిస్తూ తెలంగాణ హైకోర్టు తీర్పునిచ్చింది.
